अस्पतालबाट परीक्षण नगरी पठाउने सरकारको गैरजिम्मेवार निर्णय : लेखक

काठमाडौं : नेपाली कांग्रेसका केन्द्रीय सदस्य रमेश लेखकले कोरोना परीक्षण बिनै अस्पतालबाट घर फर्काउन स्वास्थ्य मन्त्रालयले गरेको परिपत्र सरकारको गैरजिम्मेवार निर्णय भएको बताएका छन् । उनले सरकारको निर्णयको विरोध गर्दै निर्णय सच्याउन सरकारसँग माग गरे । कांग्रेस क्षेत्रीय समिति क्षेत्र नं. ३ का नेता कार्यकर्तासँगको अन्तक्र्रिया कार्यक्रममा उनले परीक्षण बिनै घर पठाउने निर्णय सरकारको गैरजिम्मेवार निर्णय भएको दावी गरे । ‘सरकार गैरजिम्मेवार बन्दै गएको छ । तीनै तहका सरकारबीच समन्वय भएको देखिँदैन । स्वास्थ्य मन्त्रालयको परिपत्रले पनि थप महामारी फैलाउने निश्चित छ,’ उनले भने, ‘परीक्षण बिनै अस्पतालबाट घर पठाउने भन्ने सरकारको परिपत्रले कोरोना थप भयावह हुने निश्चित छ ।’उनले सरकारसँग कोरोना रोकथाम र नियन्त्रणका लागि कुनै स्पष्ट कार्ययोजना नभएको दावी गर्दै सरकारको क्षमतामाथि प्रश्न गरे ।‘देशभरमा १२/१३ सय जनालाई मात्र उपचार गर्ने व्यवस्था गरेको थियो पाँच महिनामा । तर अहिले संक्रमित संख्या ह्वात्तै बढेपछि सरकार अत्तालिएको छ,’ उनले भने, ‘अब संक्रमितको उपचार गर्ने सरकारको क्षमता नै छैन । त्यसैले परीक्षण नै नगरी घर पठाउने निर्णय गरेको हो । यसको विरोध गर्नुपर्छ । परीक्षण बिनै घर पठाउँदा घर परिवार, छिमेक हुँदै सिँगो बस्तीलाई नै जोखिम बढाउने निश्चित छ । उनले कांग्रेसका स्थानीय नेता कार्यकर्तालाई क्वारेन्टाइन व्यवस्थापनमा लाग्न आग्रह गरे । स्वास्थ्य जोखिमलाई ख्याल गरेर कोरोना नियन्त्रणमा स्थानीय सरकारसँग समन्वय गर्न नेता लेखकले आग्रह गरे ।‘कांग्रेको उपस्थिति देखिएको छ । कांग्रेसले राम्रो समन्वय गरिरहेको छ । स्वास्थ्य जोखिमलाई ख्याल गरेर काम गर्न आग्रह । यसलाई निरन्तरता दिनुपर्छ, उनले भने, ‘सरकार पक्षका मान्छेहरु आफूले गर्नुपर्ने काम पनि नगर्ने अनि अरुले गर्दा राजनीति गर्न खोजिरहेका छन् । कांग्रेसका साथीहरु चनाखो भएर आफ्ना कुरा स्पष्ट पार्नुपर्छ ।’